Jos 5 | NdeIBE | STEP | Kwathi amakhosi ama-Amori ayebusa intshonalanga yeJodani lamakhosi wonke amaKhenani ayebusa ezigcawini ezisekelana lokhumbi lolwandle esizwa ukuthi uJehova wayomise njani uJodani phambi kwabako-Israyeli baze bachapha, izinhliziyo zawo zathuthumela aswela izibindi zokumelana labako-Israyeli.

Joshua 5

Ukusokwa eGiligali

1 Kwathi amakhosi ama-Amori ayebusa intshonalanga yeJodani lamakhosi wonke amaKhenani ayebusa ezigcawini ezisekelana lokhumbi lolwandle esizwa ukuthi uJehova wayomise njani uJodani phambi kwabako-Israyeli baze bachapha, izinhliziyo zawo zathuthumela aswela izibindi zokumelana labako-Israyeli.

2 Ngaleso isikhathi uJehova wathi kuJoshuwa, “Khanda izingqamu ezibukhali ubususoka abako-Israyeli njalo.” 3 Ngakhoke uJoshuwa wakhanda izingqamu ezibukhali wasesoka abako-Israyeli eGibheya Haralothi.

4 Nansi isizatho sesenzo lesi: Bonke labo abaphume eGibhithe – wonke amadoda ayengabuthelwa empini afela enkangala ephakathi kommango esuka eGibhithe. 5 Bonke abantu abaphumayo babesokiwe kodwa bonke abantu ababezalelwe enkangala phakathi kohambo lokusuka eGibhithe babengasokwanga.

6 Abako-Israyeli babezulazule enkangala okweminyaka engamatshumi amane amadoda wonke ayefanele ukubuthelwa empini ngesikhathi esuka eGibhithe aze afa, njengoba engazange alalele uJehova. UJehova wayefunge waqinisa kubo wathi ayengasoze alibone ilizwe ayelithembise oyise ukuthi bazalinikwa, ilizwe eligeleza uchago loluju. 7 Ngakho wondla amadodana ezikhundleni zabo okuyiwo asokwa ngoba kungazanga kube lethuba lokubasoka endleleni. 8 Kwathi isizwe sonke sesisokiwe, sahlala ezihonqweni kwaze kwaphola.

9 UJehova wasesithi kuJoshuwa, “Lamhla ngisuse isigcono seGibhithe kini.” Yikho indawo leyo lokhu ibizwa ngokuthi yiGiligali kuze kube lamhlanje.

10 Ngokuhlwa kwelanga letshumi lane kuleyo nyanga, bathi belokhu behlezi ezihonqweni zabo eGiligali emagcekeni eJerikho, abako-Israyeli benza umkhosi wePhasika. 11 Ngosuku olwalandela usuku lwePhasika, khona mhlalokho, badla okunye ababekuvune emhlabathini: isinkwa esingela mvubelo lamabele akhanzingiweyo. 12 Imana yema ukukhithika ngelanga elalandela lelo abadla ngalo ukudla okwakuvela emhlabathini; ngakho kwakungasela mana yabako-Israyeli, kodwa ngalowo mnyaka badla okwelizwe leKhenani.

Ukuwa kweJerikho

13 Kwathi uJoshuwa esesondele eJerikho, wakhangela wabona indoda eyayimi phambi kwakhe ilomhedla esandleni sayo, uJoshuwa wasondela kuyo wayibuza wathi “Ungowakithi kumbe ungowezitha zethu?”

14 Yaphendula yathi “Angikho ndawo, kodwa njengomlawuli webutho likaJehova sengifikile.” UJoshuwa wathi mbo phansi ngobuso ngokudumisa waseyibuza esithi, “Kambe uJehova ulombiko bani kule inceku yakhe?”

15 Umlawuli wamabutho kaJehova waphendula wathi, “Khulula izicathulo zakho ngoba indawo omi kuyo ingcwele.” UJoshuwa wenza njalo.